Арманистон президенти Серж Саргсян мамлакат Хавфсизлик кенгаши йиғилишини чақирди. У ядро хавфсизлиги саммитидаги иштирокини якунлаб, айни пайтда АҚШдан республикага қайтмоқда. Бу ҳақда давлат раҳбари маъмурияти маълум қилди, дея хабар беради «ТАСС».
Маъмуриятнинг билдиришича, йиғилиш кун тартибига «Озарбайжон томонидан Тоғли Қорабоғ билан туташув чизиғида амалга оширилган ҳужумкор ҳаракатлар ва шу билан боғлиқ масалалар» киритилган.
Бош вазир Овик Абрамян мамлакатдаги бир қатор муассасалар раҳбарлари иштирокидаги йиғилишда «Арманистон давлат тизимлари ўзларининг бор имкониятлари билан вазиятни ўнглаш учун зарур қадамлар ташлашга тайёр эканлиги»ни маълум қилди.
Эслатиб ўтамиз, олдинроқ Россия президенти Владимир Путин Тоғли Қорабоғдаги можаро томонларини зудлик билан ўт очишни тўхтатишга чақирганди.
Изоҳ (0)