Вьетнам президенти Чионг Тан Шанг Миллий Мажлисда ўтказилган овоз бериш натижаларига кўра лавозимидан озод этилди. Бу ҳақда, «Синьхуа» агентлигига асосланиб, «РИА Новости» хабар бермоқда.
Маълум бўлишича, 473 овоз бериш бюллетенининг 447 тасида уни президентликдан бўшатиш талаби изҳор этилди.
Чионг Тан Шанг январь ойи охирида бўлиб ўтган сайловда коммунистик партия марказий қўмитаси таркибига кира олмаган эди.
Миллий Мажлис раиси этиб сайланган Нгуен Тхи Ким Нган хоним шанба, 2 апрелда ўтказилиши мўлжалланган сайловда иштирок этадиган ягона номзод сифатида жамоат хавфсизлиги вазири, генерал Чан Дай Куангни кўрсатди.
Мамлакат пойтахти Ханойда шу кунларда Миллий Мажлис сессияси бўлиб ўтмоқда. Унда ижроия ҳокимияти раҳбарлик таркиби сайланади. Яқин кунларда парламентда янги президент ва бош вазир сайловлари бўлиб ўтади. Бу мансабларни Чан Дай Куанг ҳамда амалдаги бош вазирнинг ўринбосари Нгуен Суан Фук эгаллаши кутилмоқда. Уларнинг иккиси ҳам мамлакат коммунистик партияси марказий қўмитаси аъзосидир.
Изоҳ (0)