29 март куни Ларнака аэропортида полициянинг етти соатлик панд-насиҳатларидан сўнг, EgyptAir самолётини олиб қочиб кетган Саиф Элдин Мустафо таслим бўлди. Мисрлик танасига ўрнатилган портловчи моддани ҳаракатга келтириш билан таҳдид қилди, аммо у аслида қалбаки бўлиб чиқди; унинг талаби билан Искандариядан Қоҳирага учаётган самолёт Кипрга қўнди. Охир-оқибат маълум бўлишича, эркак ўзи 1990 йиллар бошида ташлаб кетган хотини ва тўрт фарзанди билан кўришмоқчи бўлган. Meduza самолётнинг гаровга олиниши ва босқинчининг ўзи ҳақида маълум бўлган ахборотни келтириб ўтди.
Саиф Мустафо 60 ёшлардаги мисрлик бўлиб, унинг ҳаёти Кипр билан чамбарчас боғлиқ. 1986 йилда у кипрлик Марина Параску исмли қиз билан танишиб, унга уйланади. Тўрт йил ичида улар беш фарзандли бўлади (улардан бири бир неча йил аввал автоҳалокатда нобуд бўлган). 1990 йиллар бошида Мустафо ва Параску ажрашган ва эркак, собиқ хотини сўзларига кўра, ўз фарзандларига ҳеч қандай ғамхўрлик қилмаган.
Кипрнинг Newsbomb нашри маълумотларига кўра, Мустафо ўтган йили «Фаластинни озод этиш фронти»ни қўллаб-қувватлаган ва Ёсир Арофатнинг ашаддий тарафдори бўлган. У Ларнакадаги намойишларда қатнашган ва полиция томонидан дўппосланган. 1994 йилда Мустафога Кипрга келишни тақиқлаб қўйишган, бунинг сабаби аниқ қилиб келтирилмади. Newsbomb ёзишича, у Мисрда тўрт йиллик қамоққа ҳукм қилинган ва, эҳтимол, мамлакатни тарк этиш ҳуқуқига эга бўлмаган. Грециянинг Protothema нашри таъкидлашича, Мустафони Кипрдан депортация қилишган. Судда унинг ўзи Миср ҳукумати айби билан 24 йилдан буён оиласи билан кўриша олмаганини айтган.
Саид Мустафо Искандариядан Қоҳирага учаётган Миср ички рейсини гаровга олганини парвоздан 15 дақиқа ўтиб эълон қилган. У экипаж аъзосига яқинлашиб, портловчи қурилмага ўхшатиб ясалган белбоғини ва қўлидаги «детонатор»ни кўрсатди, лайнер гаровга олинганини эълон қилди ва ҳаммадан ўз паспортини кўрсатишни сўради. У учувчига самолёт гаровга олингани ҳақида хабар беришни буюрди ва Туркия, Греция ёки Кипрга қўнишни (асосийси, Мисрга эмас) сўради. Истилочи агар самолёт Миср ҳудудига қўнса, ўзини портлатишга ваъда берди.
Кейинроқ маълум бўлишича, Мустафо «бомба»ни iPhone корпусларидан ясаган, унда ҳеч қандай портловчи модда бўлмаган. Йўловчилар буни билмаган ва қўрқиб кетган, аммо ўзларини хотиржам тутган ва саросимага тушмаган. Улардан бири рафиқасига қўнғироқ қилиб, банкда унинг йиғиб қўйган пуллари борлигини айтган, шундан сўнг йўловчининг хотини телефон орқали унинг айнан қайси банк эканлигини суриштира бошлаган. Яна бир йўловчи ундан аэропортда олиб қўйилган музлатилган товуқ ҳақида қайғурган; яна бири Кипрга қўниш олдидан уйғониб кетган ва самолёт гаровга олинганлигини тушунмаган ҳолда, бошқа самолётга ўтиришга улгурмай қолишидан жаҳли чиққан.
Кипрдаги Ларнака аэропортига қўнгач, Саиф Мустафо йўловчиларни қўйиб юбора бошлади. Дастлаб у барча мисрликларга кетишга рухсат берди, самолётда фақат экипаж ва хорижликларни қолдирди. Сўнг лайнерда экипажнинг тўрт аъзоси ва буюк британиялик уч йўловчи қолди. Улардан бири, Бен Иннс, энди йўқотадиган нарсам йўқ, дея, гаровга олган шахсдан бирга суратга тушишни сўради. Кейинроқ Иннс нима учун бундай қилганини ўзи ҳам унчалик тушунмаганлигини айтди. Аммо у суратга тушиш пайтида «портловчи қурилма» ҳақиқийга ўхшамаслигини англаб, тинчланди.
Етти соатлик музокаралардан сўнг Мустафо гаровдагиларнинг барчасини қўйиб юборди ва полицияга таслим бўлди.
Изоҳ (0)