Кеча, 24 март куни Ўзбекистон терма жамоаси ЖЧ—2018 ҳамда Осиё Кубоги—2019 саралаши доирасида Филиппинга қарши баҳс олиб борди ва 1:0 ҳисобида ғалаба қозонди. Учрашувдан сўнг Ўзбекистон терма жамоаси ҳужумчиси Александр Гейнрих бўлиб ўтган ўйин ҳақида ўз фикрларини билдириб ўтди, деб хабар беради «Sports.uz».
«Кўплаб вазиятлар яратдик, аммо улардан унумли фойдалана олмадик. Рақиб дарвозасига кўпроқ гол уриб, мухлисларни хурсанд қилиш ниятимиз бор эди. Қандайдир тушунарсиз сабабларга кўра, тўп Филиппин дарвозасидан жой олгиси келмади. Бундай ўйинлар баъзида бўлиб туради. Яхшиямки, гол уриб, 3 очкони ишлаб олдик ва гуруҳ пешқадамига айландик. Голли узатмага эътибор бермасликни маъқул кўрган бўлардим. Энг асосийси – бу ғалаба. Навбатдаги ўйинни Баҳрайнга қарши ўтказамиз. Филиппинга урмаган голларимизни бўлажак ўйинда урамиз, деб умид қиламан. Арабларга қарши ўйин осон кечмаслиги аниқ, лекин энг юқори тайёргарлик билан майдонга тушамиз», – дейди Александр Гейнрих.
Эслатиб ўтамиз, Филиппин устидан эришилган ғалабадан сўнг Ўзбекистон терма жамоаси «H» гуруҳида очколар сонини 18 тага етказиб, гуруҳ пешқадамига айланиб олди. Иккинчи ўринда бораётган Шимолий Корея термаси ҳисобида 16 очко мавжуд.
Маълумот учун, 24 март, пайшанба куни «H» гуруҳида Баҳрайн ўз майдонида Яман футболчиларини қабул қилиб, 3:0 ҳисобида ғалаба қозонди.
Мавзуга оид:
Изоҳ (0)