20 февралдан буён Ўзбекистон ички ишлар органлари «Тозалаш — Аксилтеррор» кенг миқёсли тезкор-қидирув тадбирларини ўтказмоқда. «Газета.uz»нинг «На посту» газетасига асосланиб хабар беришича, тадбирларда нафақат милиция ходимлари, балки «Маҳалла посбони» жамоат тузилмаси вакиллари ҳамда фуқароларнинг ўз-ўзини бошқариш органлари фаоллари иштирок этмоқда.
Ўтган ой мобайнида ишчи гуруҳлар томонидан турли объектлар — корхоналар, муассасалар, савдо нуқталари, кўнгилочар муассасаларнинг 90 фоизида текширувлар ўтказилди. Текширувлар давомида 143,8 мингдан ортиқ маъмурий қонунбузилиш ҳолатлари аниқланган бўлиб, уларнинг 36,7 мингдан зиёд қисми паспорт-виза режими бузилиши ҳолатлари билан боғлиқдир. 261 нафар чет эл фуқароси ҳамда фуқаролиги йўқ шахслар мамлакат ҳудудида бўлиш қоидаларини бузганликда айбланиб, Ўзбекистондан чиқариб юборилди.
Жамоат жойларида спиртли ичимликлар ичган 887, гиёҳванд моддалар истеъмол қилган 114, руҳий хасталикка чалинган 306 киши даволаниш муассасаларига юборилди. Доимий иш ўрни ва яшаш жойига эга бўлмаган 1268 киши реабилитация марказларига йўлланди. Ота-она назоратисиз қолган 645 нафар вояга етмаган шахс ушбу ёш тоифасидаги фуқароларга ижтимоий-ҳуқуқий ёрдам кўрсатиш марказларига жўнатилди.
Профилактика инспекторлари раҳбарлигидаги мураббийлар гуруҳлари профилактик ҳисобдаги 256,5 минг киши ҳамда уларнинг оила аъзолари билан тарбиявий-тушунтириш ишларини ўтказди.
Бошқа давлатларга узоқ муддатга чиқиб кетган 75 мингдан ортиқ фуқаронинг шахси аниқланиб, ҳисобга киритилди. Чет элда узоқ муддат бўлиб қайтган 70 минг киши билан профилактик суҳбатлар ўтказилди, уларни тиббий кўрикдан ўтказиш ва ишга жойлаштириш борасида чоралар кўрилди.
Шунингдек, тадбирлар мобайнида жиноят содир этганликда гумон қилиниб, қидирилаётган 808 киши қўлга олинди. Бундан ташқари, мамлакат ҳудудида 2763 жиноят фош қилинди.
Республикада доимий ишлаётган 246 назорат-ўтказиш пунктлари, блокпостлар ва чегара зоналарида 939 минг машина текширилди. Текширувлар асносида 42 килограмм гиёҳванд моддалар олиб кирилишига тўсқинлик қилинди.
Профилактика мақсадларида маҳалла ва қишлоқларда, корхона, ташкилот ва муассасаларда 13,8 мингдан ортиқ учрашувлар ва давра суҳбатлари ўтказилиб, уларда фуқаролар огоҳликка чақирилди.
Изоҳ (0)