Беш нафар ўзбекистонлик теннисчи Namangan ITF Juniors турнирини тарк этди

Наманган шаҳридаги «Дўстлик» теннис кортларида ўсмирлар ўртасидаги Namangan ITF Juniors теннис турнири давом этмоқда, деб хабар беради «Оламспорт».

Ушбу турнирида иккинчи рақам остида таснифланган ўзбекистонлик Шаробиддин Абзалов илк даврада британиялик Луис Нюманни 6:0, 6:0 ҳисобида мағлуб этиб, иккинчи даврага йўл олди.

Абзаловдан ташқари ушбу мусобақада иштирок этган барча ўзбекистонлик теннисчилар биринчи босқичнинг ўзида мағлубиятга учради. Жумладан, Азамат Луқмонов британиялик Жеймс Дэвисга 0:6, 2:6, Сергей Фомин ҳиндистонлик Адил Калянпурга 6:7, 6:7, Амал Султанбеков британиялик Жек Моллойга 2:6, 4:6, Азизхон Турғунов россиялик Дмитрий Морозовга 1:6, 6:4, 5:7, Данис Байбеков эса Жанубий кореялик Йонг Сеок Жеонгга 2:6, 0:6 ҳисобида имкониятни бой бериб қўйди.

Маълумот учун, Шаробиддин Абзалов Namangan ITF Juniors теннис турнирининг иккинчи даврасида суриялик Назим Наога қарши кортга чиқади.