Ўзбекистон Профессионал футбол лигаси талабига кўра, 25—26 март кунларига белгиланган Ўзбекистон Кубогининг нимчорак финал босқичи дастлабки беллашувларининг барчаси табиий қопламали майдонларда ўтказилиши керак. Бу ҳақда «Championat.asia» хабар бермоқда.
Нимчорак финалда қатнашаётган клублардан фақат «ЎзДонгЖу»нинг уй стадиони бу талабга жавоб бермайди. Уйдаги ўйинларни Андижоннинг Шўрбулоқ даҳасида жойлашган мактаб-интернатга қарашли сунъий қопламали майдонда ўтказадиган жамоа 25 мартга қадар ўзи учун табиий қопламали майдон топиши керак.
«ЎзДонгЖу» 1/16 финал доирасида Ғузорнинг «Шўртан» клубини мағлуб этиб, Олий Лига иштирокчисини Кубокдан чиқариб юборган Биринчи Лиганинг ягона вакили бўлганди. Клуб нимчорак финалда Тошкентнинг «Локомотив» клубига қарши майдонга тушади.
«Championat.asia»нинг ёзишича, ЎзПФЛнинг бу талаби ташкилотнинг мусобақалар ўтказиш регламентига асосланмаган. Регламентда Ўзбекистон Кубоги учун алоҳида бўлим ажратилган бўлиб, унда мусобақа доирасидаги ўйинлар табиий қопламали майдонларда ўтказилиши шартлиги ҳақида банд йўқ.
Хабар беришларича, ЎзПФЛ ўтган йили нимчорак финал босқичи олдидан ҳам шундай талаб билан чиққан, натижада Биринчи Лиганинг уч клуби — «Обод», «Оқтепа» ва «Пахтакор-2» бошқа майдон излашга мажбур бўлган эди.
ЎзПФЛ бу талабни 1/16 финалдан олдин эмас, айнан нимчорак финал олдидан қўяётгани сабаби маълум қилинмаган.
Ўзбекистон Кубоги—2016 Нимчорак финал босқичи
25 март, жума«Пахтакор» (Тошкент) — «Бухоро» (Бухоро)«Навбаҳор» (Наманган) — «Қўқон-1912» (Қўқон)«Қизилқум» (Навоий) — «Андижон» (Андижон)«Бунёдкор» (Тошкент) — «Обод» (Тошкент)«Металлург» (Бекобод) — «Олмалиқ» (Олмалиқ)«Машъал» (Муборак) — «Сўғдиёна» (Жиззах)«ЎзДонгЖу» (Андижон) — «Локомотив» (Тошкент)
26 март, шанба«Нефтьчи» (Фарғона) — «Насаф» (Қарши)
Изоҳ (0)