Самвел Бабаян: Футболчи Фарғонаданми ёки Қашқадарёдан — фарқи йўқ, Ўзбекистон паспорти бўлса, термада ўйнаш имконияти бор

Футбол бўйича Ўзбекистон ва Филиппин терма жамоалари ўртасидаги 24 март куни бўлиб ўтадиган ЖЧ—2018 ва Осиё Кубоги—2019 саралаш учрашуви олдидан икки терма жамоа бош мураббийлари иштирокида матбуот анжумани ташкил этилди. «Championat.asia» хабарига кўра, анжуманнинг иккинчи қисмида Ўзбекистон миллий терма жамоаси бош мураббийи Самвел Бабаян журналистларнинг саволларига жавоб қайтарди.

«Филиппин термасига ҳурмат билан муносабатда бўламиз. Уларда бош мураббий кучли. Эртага кучли ўйин кўрсатиб, ғалаба қозонишга ҳаракат қиламиз. Бизга уч очко жуда керак. Шу боис асосий мақсад ғалаба қозониш», — деди Ўзбекистон миллий терма жамоаси бош мураббийи.

ЖЧ—2018 саралашининг Тошкентда ўтган аввалги икки турига «Пахтакор» стадиони мезбонлик қилганди, навбатдаги ўйинлар эса «Бунёдкор» стадионида бўлиб ўтади. «Аввал ҳам ‘Бунёдкор’да ўйнашни истагандик, бироқ ўшанда майдон ҳолати қониқарли эмасди. Ҳозир эса барчаси идеал», — деди миллий терма жамоа устози.

Самвел Бабаян «Локомотив» аъзоси Сардор Мирзаевга нима учун жавоб бериб юборилгани ҳақидаги саволга жавоб берди: «Мирзаев мавсумни жуда яхши бошлади. Осиё Чемпионлар Лигасида ҳам, Олий Лигада ҳам яхши ўйинлар кўрсатди. Шу боисдан ҳам терма жамоа йиғинига чақирилди. У ҳали ҳам терма жамоага номзод футболчи. Унга имконият берамиз».

Ярим ҳимоячи Станислав Андреевнинг терма билан бирга бўлиб турганини изоҳлашда Бабаян «Локомотив» футболчиси Жасур Ҳасановни мисол қилиб келтирди: «Жасур Ҳасанов ҳам ОЧЛда ўйнамади, лекин уни ҳам чақирдим. Айтмоқчиманки, терма жамоага барча кучли футболчиларни чақирамиз. Бу менга ёки бошқага қарашли жамоа эмас, бу халқимизнинг жамоаси».

Журналистларнинг ғалаба учун мукофот пули берилиши борасидаги саволига Самвел Бабаян шундай жавоб берди: «Бу жамоа сири. Мираброр Усмонов бошчилигидаги терма жамоага эътибор жуда катта. Ишонинг, ҳар бир футболчи пул учун эмас, Ватан учун майдонга тушади».

«Биз терма жамоага футболчи жалб қилишда географияга қарамаймиз, у Фарғонада ўйнайдими ёки Қашқадарёда — фарқи йўқ. Кимда Ўзбекистон паспорти бўлса, унда терма жамоага чақирилиш имконияти бор», — деб, Бабаян Фарғона водийси клубларидан терма жамоага футболчилар жалб этилмаётгани борасидаги саволга жавоб берди.

Аввалроқ Филиппин миллий терма жамоаси бош мураббийи Томас Дули Ўзбекистонга қарши ўйин олдидан ўз фикрлари билан ўртоқлашган эди. Эслатиб ўтамиз, Ўзбекистон — Филиппин учрашуви 24 март, пайшанба куни Тошкент вақти билан соат 18:00 да бошланади.