Футбол бўйича Ўзбекистон миллий терма жамоаси йиғинига келиб қўшилган Қатарнинг «Ал-Жаиш» клуби аъзоси Сардор Рашидов Филиппинга қарши бўлиб ўтадиган ўйин олдидан футболчи йигитларнинг спорт формаси яхши ҳолатда эканлигини қайд этиб ўтди. Бу ҳақда «Championat.asia» хабар бермоқда.
Маълумот учун, Ўзбекистон миллий терма жамоаси 24 март, пайшанба куни ЖЧ—2018 ва Осиё Кубоги—2019 саралаши доирасида Тошкентдаги «Бунёдкор» стадионида Филиппин терма жамосини қабул қилади.
«Филиппин ва Баҳрайнга қарши сафар учрашувларини йирик ғалаба билан якунлаган бўлсак-да, бу нарса хотиржамликка берилишимиз учун сабаб бўлолмайди, бунга ҳаққимиз йўқ. Футболда ҳамма нарса бўлиши мумкин. Йиғинга эндигина келиб қўшилган бўлсам-да, йигитларнинг спорт формаси яхши ҳолатда эканлиги кўриниб турибди», — дейди Сардор Рашидов.
Журналистнинг «Насаф» дарвозасига урилган гол борасидаги саволига «Ал-Жаиш» футболчиси қуйидагича жавоб берди: «Биз муҳим ғалабага эришдик. Урган голим эса баъзи мухлисларга ёқмади ва мен буни тўғри тушунаман. Уларнинг ранжишга ва мендан норози бўлишга ҳақлари бор. Бунинг учун қаршилик мухлислардан узр сўрайман».
Шунингдек, Сардор Рашидов унинг голи Қатар клубига ғалаба келтирганидан хурсанд эканлигини ҳам қўшимча қилди: «Нима қилай, менинг ишим шу. Киритган голим жамоамга ёрдам берганидан хурсандман. Уни нишонлаганимга келсак, анчадан буён ‘Ал-Жаиш’ сафида гол уролмаётгандим. Шу боисдан узоқ кутилган гол ўйиннинг сўнгги дақиқаларида киритилганида, хурсандчилигимни яшира олмадим. Бу кимгадир ёқмаган бўлса, узр сўрайман».
Маълумот учун, «Насаф» ва «Ал-Жаиш» клублари ўртасидаги иккинчи учрашув 5 апрель куни бўлиб ўтади.
Изоҳ (0)