Футбол бўйича Ўзбекистон ва Филиппин терма жамоалари ўртасидаги 24 март куни бўлиб ўтадиган ЖЧ—2018 ва Осиё Кубоги—2019 саралаш учрашуви олдидан икки терма жамоа бош мураббийлари иштирокида матбуот анжумани ташкил этилди. «Championat.asia» хабарига кўра, дастлаб Филиппин бош мураббийи Томас Дули журналистларнинг саволларига жавоб қайтарди.
Филиппин терма жамоаси ажойиб ҳаво ва ажойиб стадионда Ўзбекистонга қарши кураш олиб бориши ҳақида тўхталар экан, Томас Дули таркибдадаги йўқотишлар ўрнини боса оладиган футболчилари бор эканлиги ҳақида айтиб ўтди: «Мен ҳаётда реалист инсонман. Ўзбекистон гуруҳдаги энг кучли рақиб. Эртага ҳар бир футболчимиз бор имкониятини ишга солади. Ютамиз деб ваъда беролмайман, аммо охиригача курашамиз».
Ўзбекистонлик журналистлар эътиборидан Филиппин терма жамоаси мураббийининг матбуот анжуманига «We believe» («Ишонамиз») ёзуви туширилган футболкада келгани четда қолмади.
«Филиппин келажакда Осиёнинг футболи ривожланган мамлакати бўлишига ишонаман. Филиппин аҳолиси ёш, футбол энди ривожланмоқда. Энг оммабоп спорт тури ҳозирча баскетбол. Лекин уни ҳамма ҳам ўйнай олмайди. Футболда эса бўйинг баланд ёки жуссанг катта бўлиши шарт эмас. 70 фоиздан ортиқ аҳолиси камбағалликда кун кечираётган Филиппин кун келиб ўзини кўрсатишига ишонаман. Ҳозир Осиё Кубогига чиқишга уриняпмиз. ЖЧ—2022 саралашида эса ҳозиргидан яхшироқ қатношмоқчимиз», — деб изоҳ берди Томас Дули.
Томонларнинг Филиппин пойтахти Манилада бўлиб ўтган учрашувида Самвел Бабаян бошчилик қилаётган Ўзбекистон миллий терма жамоаси 5:1 ҳисобида устун келганди. Томас Дули ўша мағлубият борасида ҳам фикрлари билан ўртоқлашди.
«1:5 ҳисоби мен учун катта сюрприз бўлганди. Тезкор гол барча режаларимизни бузиб юборган. Кучли рақибга қарши иккинчи гол ҳам ўтказиб юборилгач, ўзингизга келишингиз янада қийинлашиб кетади. Ўзбекистон сафида Россия, Украина ва бошқа кучли лигаларда тўп сурадиган футболчилар бор. Бизда эса бундайлар йўқ», — дейди филиппинликлар устози.
«Ўзбекистон Манилада жуда ноқулай об-ҳаво шароитида тўп сурган. Эртага эса ажойиб иқлим шароитида футбол ўйнаймиз. Унда ҳамма нарса бўлиши мумкин. Германия терма жамоаси Бразилияни 7:1 ҳисобида енга олгани ҳам бунга мисолдир. Ўзбекистон термасининг кучсиз жиҳатлари бор, аммо улардан фойдаланиш қийин. Биз Германия терма жамоаси бўлганимизда, балки фойдаланардик», — деб фикрига якун ясади Дули.
Эслатиб ўтамиз, Ўзбекистон — Филиппин учрашуви 24 март, пайшанба куни Тошкент вақти билан соат 18:00 да бошланади.
Изоҳ (0)