Ростов-Донда қулаган FlyDubai’нинг Boeing 737-800 лайнери иккинчи учувчиси авиаҳалокатдан олдин бир кунлик танаффус билан 11 кун ишлаган. Бу ҳақда ишчи кун тартибини RT телеканалига тақдим этган компаниянинг собиқ учувчиси маълум қилган, дея хабар беради Meduza.
Унинг айтишича, авиаташувчида ёш учувчиларни ноқулай — узоқ муддатли ва кечки рейсларга белгилаш одатий ҳол бўлган. Boeing 737-800 иккинчи учувчиси иш жадвали шундай тузилгандики, самолёт ҳалокатга учраган куни биологик соатларига кўра, Ростов-Донга учиши эмас, ухлаши зарур эди.
Кечки рейслардан кундузги рейсларга олиш амалиёти FlyDubai’да одатий ҳол бўлган. Бундай вазият авиакомпаниялар иш юритиш қоидаларидан четга чиқиш ҳисобланмайди, бироқ учувчилар саломатлигига салбий таъсир кўрсатади.
Собиқ учувчининг айтишича, самолёт капитани оғир жадвал туфайли бўшашга ариза берган ва у бир неча ҳафтадан кейин ишдан кетиши лозим эди.
Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида самолёт бортида бўлган барча йўловчилар ва экипаж аъзолари ҳалок бўлган.
Изоҳ (0)