Калифорния суди АҚШ адлия вазирлиги талабига кўра Федерал қидирув бюросининг Apple компаниясига қарши ишини кўриб чиқишни қолдирди. Бу ҳақда Meduza хабар бермоқда.
Вазирликнинг билдиришича, ФҚБ террорчи Саид Фаруқга тегишли iPhone қурилмасини «учинчи томон» ёрдамида очишга ҳаракат қилиб кўради, шу боис смартфон ишлаб чиқарган компания кўмаги керак бўлмаслиги мумкин. Айни пайтда, мазкур янги усул ҳали синовдан ўтиши лозимлиги таъкидланган.
Шу тариқа, Калифорния судининг 22 мартга белгиланган мажлиси бекор қилинди. 5 апрелга қадар ҳукумат iPhone қурилмасини бузиб, ундаги маълумотларни олишга уриниш натижалари ҳақида маълум қилиши лозим.
Эслатиб ўтамиз, 16 февраль куни АҚШ суди Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди. Корпорация раҳбари Тим Кук бунга жавобан суд қарорига расмий эътироз билдирилишини таъкидлаган.
Изоҳ (0)