АҚШда Россиянинг «таҳдидли ҳаракатлари» борасида дунёда умумий фикр борлигини маълум қилишди

Москванинг баъзи хатти-ҳаракатлари сўнгги вақтларда «дунёдаги тартибга хавф солмоқда». Бу ҳақда АҚШ давлат котиби ёрдамчиси Том Малиновски маълум қилди, деб ёзади «РБК». Унинг таъкидлашича, дунёда бу борада кенг консенсус (умумий фикр, якдиллик) мавжуд.

Пентагонда Россия ҳақида «энг катта таҳдид» сифатида гапирилиши, у эса ўз чиқишларида «АҚШ Россияни заифлаштиришга ҳаракат қилаётгани»ни рад этиши сабаблари ҳақида берилган саволга жавобан, Малиновски «кучли ва гуллаб-яшнаётган Россия»нинг мавжудлиги бутун дунё манфаатлари учун жавоб беришини қайд этди.

Шу билан бирга, унинг сўзларига кўра, Россия қонун устуворлигини тан олиши, «ўз қўшнилари суверенитети ва ҳудудий яхлитлиги»ни ҳурмат қилиши ҳамда дунёдаги ишларга «ижобий ҳисса» қўшиши керак.

«Бироқ айни пайтда Россия ҳамма соҳаларда ҳам бундай ролни ўйнамаяпти. Дунёда Россиянинг баъзи хатти-ҳаракатлари сўнгги йилларда халқаро тартибга таҳдид хусусиятига эга бўлаётгани ҳақида кенг халқаро консенсус мавжуд. Россиянинг Украинага қуролли аралашуви бундай ҳаракатларга мисол бўла олади», — деди у.