Ростов-Донда қулаган «Боинг»да ўзбекистонлик йўловчи бўлгани маълум қилинди

Россиянинг Ростов-Дон шаҳрида қулаган FlyDubai’нинг Boeing 737-800 лайнери бортида Россия фуқароси бўлмаган беш нафар йўловчи, хусусан, Ўзбекистон фуқароси ҳам бўлган. Бу ҳақда, Россиянинг Дубайдаги Бош консуллиги маълумотларига асосланиб, «Интерфакс» хабар бермоқда.

Консулликдаги навбатчи дипломатнинг маълум қилишича, самолёт бортида асосан россияликлар, шунингдек, беш нафар чет эллик — уч нафар Украина фуқароси, бир нафар Ўзбекистон фуқароси ва бир нафар Ҳиндистон фуқароси бўлган.

• Ростов-Донда қулаган «Боинг»

Эслатиб ўтамиз, 19 март, шанба куни FlyDubai авиакомпаниясига тегишли Boeing 737-800 лайнери Россиянинг Ростов-Дон шаҳри аэропортига қўниш вақтида ҳалокатга учради. Ҳодиса оқибатида 61 киши — 55 йўловчи ва экипажнинг 6 аъзоси ҳалок бўлган.