АҚШ маъмурияти Шимолий Корея расмийларини 15 йиллик қамоқ жазосига ҳукм қилинган америкалик талаба Отто Фредерик Вомбиерни афв этиш ва зудлик билан озод қилишга чақиради. Бу ҳақда Оқ уй матбуот котиби Жошуа Эрнест маълум қилди, дея хабар беради «ТАСС».
«Шимолий Корея ҳукумати республикага келаётган америкалик фуқаролардан сиёсий ўйинларида пиёда сифатида фойдаланишга ҳаракат қилаётгани тобора ойдинлашиб бормоқда. Бу яна бир бор КХДРга бориш билан боғлиқ хавф-хатарларни кўрсатиб турибди. Шу боис АҚШ Давлат департаменти олдинроқ америкаликларга КХДРга сафардан тийилишни тавсия этганди», — дея таъкидлаган Эрнест.
Матбуот котибининг айтишича, «Вомбиер суд қилинган ва айбдор деб топилган сабаблар АҚШ ёки дунёнинг исталган бошқа мамлакатида ҳибсга олиш учун ҳатто асос бўлиб ҳам хизмат қилмасди».
Эслатиб ўтамиз, Шимолий Кореяга сайёҳлик гуруҳи таркибида келган виржиниялик талаба ўзи яшаган «Янгакто» меҳмонхонасида корейсча сиёсий плакатни девордан юлиб ташлагани учун ҳибсга олинган ва «Корея халқи бирлигига путур етказиш»га уринишда айбланиб, КХДР Олий суди томонидан 15 йиллик қамоқ жазосига ҳукм қилинганди.
Изоҳ (0)