Покистон Олий суди уй қамоғида бўлган собиқ президент (2001—2008 йиллар) Парвез Мушаррафга мамлакатни тарк этишга рухсат берди. Яқин орада унинг исми-шарифи Покистондан кетиши ман этилган шахслар рўйхатидан чиқарилади, дея хабар беради «ТАСС».
1999 йили ҳарбий тўнтариш ва бош вазир Навоз Шарифни четлатиш натижасида ҳокимиятга келган генерал Мушарраф 2013 йил мартида, Буюк Британиядаги беш йиллик ихтиёрий қувғиндан ватанига қайтганидан кейиноқ уй қамоғига олинганди. Унга нисбатан собиқ бош вазир Беназир Бхуттонинг ўлдирилишига алоқадорлик, суд ҳукмисиз чора кўришлар, 2007 йили Олий судни ноқонуний тарқатиб юбориш каби кўплаб айбловлар қўйилганди.
Покистонга қайтганидан сўнг Мушарраф Исломобод яқинидаги қароргоҳида истиқомат қилиб келган, унинг барча ҳаракатлари назоратга олиниб, заруратсиз қароргоҳ ҳудудини тарк этиши ман этилганди.
Изоҳ (0)