Россия спорт раҳбарлари маҳаллий спортчиларни тақиқланган дорилар рўйхатига қўшимчалар киритилгани тўғрисида вақтида хабардор қилмаган. Бу ҳақда Россия президенти Владимир Путин маълум қилди, дея хабар беради «РИА Новости».
«Спорт учун жавобгар мутасаддиларимиз масаланинг долзарб эканлигини тушуниб етмаган, халқаро тизимлар кўрсатмасига кўра тегишли рўйхатларга ўзгартириш киритмаган, Бутундунё аксилдопинг агентлигининг (WADA) айрим дориларни ман этиш ҳақидаги қарори ҳақида спортчилар, мураббийлар ва бошқа мутахассисларни ўз вақтида огоҳлантирмаган», — дея таъкидлаган Путин ҳукумат аъзолари билан учрашув чоғида.
Путин, шунингдек, аксилдопинг сиёсатини белгилайдиган Россия спорт вазирлиги ва мамлакат терма жамоаларининг тиббий-биологик таъминоти учун жавоб берадиган федерал агентлик ўртасида ўзаро ҳамкорлик йўқлигини танқид остига олди.
Эслатиб ўтамиз, WADA 2016 йил 1 январдан расман тақиқлаган мельдоний қабул қилгани учун кўплаб россиялик спортчилар, жумладан, теннисчи Мария Шарапова, фигурали учиш устаси Екатерина Боброва, конькида югурувчи Павел Кулижников, шорт-трекчи Семён Елистратов мусобақалардан четлатилди.
Изоҳ (0)