«Барселона» футбол клуби Европа Чемпионлар Лигасининг чорак финалига кетма-кет чиқиш бўйича рекорд ўрнатди. УЕФА расмий сайти хабарига кўра, Каталония клуби кетма-кет тўққизинчи бор мусобақанинг энг кучли саккиз жамоаси қаторига кирди.
Эслатиб ўтамиз, 16 март куни «Камп Ноу» стадионида Англиянинг «Арсенал» жамоасига қарши ўтказилган ЕЧЛ нимчорак финал жавоб ўйинида «Барселона» 3:1 ҳисобида ғалаба қозонди. Лондонда бўлган биринчи ўйинда ҳам испан клуби зафар қучган эди (2:0).
Қайд этиш жоиз, «Барселона» ўзи иштирок этаётган барча мусобақаларда 38 та учрашувдан буён мағлубиятга учрамади. Бу учрашувларнинг кетма-кет 9 тасида Каталония клуби ғалаба қозонган.
Лондоннинг «Арсенал» клуби эса қаторасига олтинчи мавсум ЕЧЛ нимчорак финалидан ўта олмаяпти. Сўнгги бор Арсен Венгер жамоаси 2009/2010 йилги мавсум нимчорак финалида Португалиянинг «Порту» клуби довонидан ўтган эди.
Шундан кейин Англия Премьер-лигаси вакили Чемпионлар Лигасининг бу босқичида «Барселона» ва «Бавария»га икки марта, «Монако» ҳамда «Милан» клубларига эса бир мартадан мағлуб бўлди.
УЕФА талқинига кўра, «Барселона» ҳужумчиси Луис Суарес «Барселона» — «Арсенал» учрашувининг энг яхши футболчиси деб топилди. Уругвайлик футболчи дастлаб Неймарнинг голига ассистентлик қилди, иккинчи бўлимда ўзи «Арсенал» дарвозасини ишғол қилди.
Изоҳ (0)