Футбол бўйича Европа Чемпионлар Лигаси нимчорак финал жавоб учрашувлари доирасидаги «Барселона» — «Арсенал» учрашувидан кейин мезбонлар устози Луис Энрике шогирдларини қўллаб турган мухлисларга ўз миннатдорчилигини билдирди, дея хабар бермоқда УЕФА расмий сайти.
Маълумот учун, 16 март, чоршанба куни «Камп Ноу» стадионида бўлиб ўтган «Арсенал»га қарши ўйинда «Барселона» 3:1 ҳисобида ғалаба қозонди. Лондонда кечган биринчи учрашувда ҳам Каталония клуби зафар қучган эди.
«Биз чорак финалга кетма-кет тўққизинчи бор йўл олдик. Шундай натижага эришган бошқа бир жамоа бор деб ўйламайман», — деди Луис Энрике. Шунингдек, у «Барселона»нинг собиқ устози Хосеп Гвардиоланинг ҳам чорак финалга йўл олгани билан табриклади.
«Пеп учун хурсандман. У муваффақиятга муносиб, унинг жамоалари ҳеч қачон таслим бўлмайди. ‘Бавария’ ва ‘Ювентус’ чемпионлик учун даъвогар жамоалар эди. Энди улардан бири сафдан чиқди ва бу албатта яхши», — деди Луис Энрике.
«Рақиб дарвозаси олдида хавф туғдириш борасида Месси, Неймар ва Суарес яхши ташкилотчи. Уларнинг ортида эса бутун бир жамоа меҳнат қилмоқда. Бизда жуда ажойиб футболчилар бор. Уларнинг ҳар бири майдонда ақлбовар қилмас ишларни амалга ошира олади, ҳар бири индивидуал кучли. Шунга қарамай уларнинг ҳаммаси жамоа учун ўйнайди. Муваффақиятларимиз сири ҳам шунда», — деди «Барселона» устози.
ЕЧЛнинг чорак финалига қуръа ташлаш маросими 18 март куни бўлиб ўтади. Луис Энрике қуръа натижаси қандай бўлишидан қатъий назар, ундан мамнун бўлишини қайд этиб, ўзи дуч келишни хоҳламайдиган ягона жамоа «Барселона» эканини билдирди.
Изоҳ (0)