Ташкил этилганига кўп бўлмаган Ўзбекистон U-17 терма жамоаси Япониядаги халқаро ўртоқлик турнирида иштирок этмоқда, деб хабар беради Ўзбекистон футбол федерацияси матбуот хизмати.
Аҳмаджон Мусаев бош мураббий этиб тайинланган, 1999 йилда таваллуд топган футболчилардан иборат терма жамоа SANIX халқаро кубоги турниридаги иштирокини бугун, 17 март куни бошлади. Турнирда, шунингдек, Япония U-17, Жанубий Корея U-17 ҳамда Пекин U-17 терма жамоалари иштирок этмоқда.
Ўзбекистон U-17 дастлабки учрашувни Японияга қарши ўтказди. Учрашув асосий вақти 0:0 ҳисобидаги дуранг натижа билан якунланди. Мусобақа регламентига кўра, дуранг билан якунланган ўйиннинг асосий вақтидан сўнг пенальтилар серияси ўтказилади. Пенальтилар сериясида японияликлар аниқроқ ҳаракат қилиб, ғалабани қўлга киритди — 5:3.
Ушбу мусобақа регламентига кўра, ўйиннинг асосий вақтида ғалаба қозонган жамоага 4 очко, мағлуб бўлган жамоага 0 очко берилади. Шунингдек, пенальтилар серияси бўйича ғалаба қозонган жамоага 2,5 очко, пенальтилар серияси бўйича мағлуб бўлган жамоага эса 1,5 очко тақдим этилади.
Маълумот ўрнида, ташкил этилганига бир ҳафта бўлган Ўзбекистон U-17 терма жамоаси 2017 йил бўлиб ўтадиган ёшлар ўртасидаги Осиё чемпионатининг саралаш турнирида иштирок этади. Яъни, айни пайтда 17 ёшни қарши олган футболчилар, бир йилдан кейин Ўзбекистон U-18 термасига айланади. Бу жамоа 2018 йил 19 ёшгача бўлган футболчилар ўртасидаги Осиё чемпионати U-19 мусобақасида иштирок этиши кўзда тутилган.
SANIX халқаро кубоги турнири
Япония U-17 – Ўзбекистон U-17 — 0:0 (пенальтилар серияси – 5:3)
Ўзбекистон U-17: 12. Умиджон Эргашев, 2. Бурҳон Усмонов, 3. Илҳомжон Алижонов, 5. Худойшукур Сатторов, 6. Достонбек Бердиқулов, 7. Бобуржон Асқаров, 8. Жаҳонгир Аҳмедов, 11. Жаҳонгир Абдусаломов, 15. Ислом Кенжабоев, 16. Суҳроб Иззатов, 19. Муҳаммад-Юсуф АбдумажидовЗахира: 1. Акром Хўжаев, 4. Отабек Бекбоев, 9. Камрон Саидазимов, 10. Зокиржон Аҳмаджонов, 13. Абдулло Раҳимжонов, 14. Жасур Раҳимов, 17. Афзалжон Холмуҳамедов, 18. Дониёр Азизов, 21. Жавоҳир Қиличев.
Изоҳ (0)