Дональд Трамп ва Ҳиллари Клинтон уч штатдаги праймеризда ғолиб чиқди, тўртинчисида пешқадамлик қилмоқда

Миллиардер Дональд Трамп Республикачилар партиясининг уч штатдаги дастлабки сайловларида ғолиб чиқди ва тўртинчисида муваффақият қозонишга яқин турибди. Демократик партия праймеризида Ҳиллари Клинтон ҳам шундай натижага эришди, дея хабар беради «РБК».

Трампнинг Иллинойс, Шимолий Каролина ва Флоридада қўли баланд келди: бу штатларнинг ҳар бирида у овозларнинг 40 фоиздан зиёдини қўлга киритди. Миссурида овозларнинг 32 фоизи ҳисоблаб чиқилган бўлиб, миллиардер Техас штатидан сенатор Тед Крузни бироз ортда қолдирмоқда. Трамп фақат Огайо штатида мағлубиятга дуч келди, бу ерда маҳаллий губернатор Жон Кейсик ғалаба қозонди.

Миллиардер энг ишонарли ғалабага Флоридада эришди, бу ерда у мазкур штатдан сенатор Марко Рубиодан 18 фоизга ўзиб кетди.

Ҳиллари Клинтон Флорида, Шимолий Каролина ва Огайодаги праймеризларни ютди. У Иллинойсда ҳам асосий рақиби Берни Сандерсдан ўзиб кетди, бироқ Миссурида ундан ортда қолмоқда.