Буюк Британияда қиммати бўйича мамлакат тарихидаги иккинчи почта маркаси — қизил пенни аукционда хусусий коллекционер томонидан 495 минг фунт (707 минг доллар)га сотиб олинди. Бу ҳақда The Independent манбаларига таяниб, «Интерфакс» хабар бермоқда.
Дунёда бундай маркадан атиги беш дона бўлиб, улардан бири Британия музейида сақланади. Унинг ноёблиги шундан иборатки, 1863 йилда сифатсиз жиҳозда босилгани сабабли ҳамма нусхаси йўқ қилинган, фақат бир варағигина сақланиб қолган. 2012 йилда яна бир қизил пенни 550 минг фунтга сотилган ва у Буюк Британия тарихидаги энг қиммат марка бўлиб турибди. Унинг баҳоси юқори эканлиги яқинда сотилган маркага нисбатан яхшироқ сақлангани билан боғлиқ.
Маълумот учун, дунёдаги энг қиммат марка 2014 йилда Нью-Йоркдаги кимошди савдосида 9,48 миллион доллар (6,7 миллион фунт)га сотилган Британия Гвианаси (British Guiana 1c Black on Magenta) ҳисобланади, у ягона нусхада чиқарилган.
Изоҳ (0)