Қабул қилиб олувчининг номини ёзишда йўл қўйилган имло хатоси хакерларга Бангладеш Марказий банки ҳисобларидан қарийб 1 миллиард долларни кўчириб ўтказишга халал берди, деб ёзади «РИА Новости».
Марказий банк тизимини бузиб кириб ҳамда зарур маълумотларни қўлга киритиб, ёвуз ниятлилар тўртта транш орқали 80 миллион долларни ўғирлашга улгурди, 20 миллион долларлик бешинчи транш эса Нью-Йорк Федерал захира банкининг қандайдир ишкалликни пайқаган ходимлари томонидан тўхтатилди, барча ўтказмалар ушбу банк орқали ўтаётган эди.
Нью-Йорк банки хакерларнинг жами 850—870 миллион доллар маблағни Филиппин ва Шри-Ланкадаги ташкилотларга трансфер қилиш ҳақидаги 30 дан ортиқ сўровларини қабул қилган. Улардан тўрттаси қондирилган, натижада фирибгарлар ҳисобига 81 миллион доллар келиб тушган. Бешинчисида эса қабул қилиб олувчи номида имло хатоси бўлган: инглизча «foundation» (муассаса, ташкилот) сўзи ўрнига, сўровда «fandation» деб ёзилган. Ўтказмани амалга ошираётган мутахассислар Бангладеш Марказий банкига мурожаат қилиб, буни аниқлаштиришга мажбур бўлган, шунда фирибгарлик фош бўлган.
Айни пайтда Бангладеш ҳукумати ўғирланган маблағни қайтаришга уринмоқда.
Изоҳ (0)