Наманган вилояти Тўрақўрғон тумани Куймазор қишлоғида футбол бўйича «Куймазор кубоги» ташкил этилди. Куймазор маҳалла фуқаролар йиғинидан маълум қилишларича, мусобақада 20 жамоа иштирок этган.
Ҳар бир жамоа таркибида 16—20 нафардан ўйинчи рўйхатдан ўтказилган, жамоалар ёш тоифаси бўйича ажратилган. Мусобақада 16 ёшдан 36 ёшгача бўлган ҳаваскор футболчилар қатнашган.
Мусобақанинг 3-ўрин учун учрашувида 1991 йилда туғилганлар жамоаси 1997 йилда таваллуд топган ўйинчилардан ташкил топган жамоани 1:0 ҳисобида мағлуб этган, финалда 1996 йил йигитлари ўзидан 10 ёш катта акалари — 1986 йилгилар жамоасига 3:1 ҳисобида имкониятни бой берди.
1991 йилда туғилган Элмурод Эшматов мусобақанинг энг яхши тўпурарига айланган бўлса, 1986 йилда туғилган Шерали Қаҳҳоров мусобақанинг энг яхши футболчиси, деб топилди. Хабар беришларича, мусобақа ғолиби 1 миллион сўм миқдоридаги пул мукофоти билан тақдирланган.
«Бундай спорт мусобақалари ёшларни жасурлик, ҳалоллик руҳида тарбиялашга, қолаверса, уларнинг спортга меҳр қўйишига сабабчи бўлади», — дейди Куймазор маҳалла фуқаролар йиғини маслаҳатчиси Рислиғой Ҳомидова.
Изоҳ (0)