Россиялик теннисчи, дунёнинг энг бой аёл спортчиси Мария Шарапова Лос-Анжелесдаги махсус матбуот анжумани чоғида 2016 йилги Австралия очиқ чемпионатидан ундан олинган намуналарда ман этилган дори — мельдоний топилганини тан олди. Бу ҳақда «Газета.ru» хабар бермоқда.
Шарапованинг адвокати Жон Хеггерти мазкур вазиятга ойдинлик киритди.
«Мария бу дорини 10 йил давомида қонуний ва ошкора қабул қилиб келган. Милдронатни Мариядаги мадорсизлик сабабларини аниқлаб бериши керак бўлган тестлардан сўнг шифокор тавсия этган. У мижозимда ижобий бўлмаган электр кардиограмма, қанд касалига мойиллик, магнийнинг паст даражаси ва иммун танқислигини аниқлади. Шифокор барча дориларни текшириб кўрди, улар ўша пайт ‘қора рўйхат’да бўлмаган. Дорилар Шарапова кортга қайтишига ёрдам берди, соғлиғи билан боғлиқ муаммолардан қутулиш ёки сезиларли равишда камайтириш имконини берди. Афсуски, 1 январда милдронат тақиқланган дорилар қаторига киритилди. Ман этилган нарса январда 25 кун давомида унинг вужудида бўлган, холос», — дея таъкидлаган Хеггерти.
Халқаро теннис федерацияси (ITF) россиялик спортчи 12 мартдан бошлаб барча мусобақалардан четлатилишини маълум қилди. The Telegraph журналисти Оливер Брауннинг билдиришича, Шарапова мельдонийни қасддан қабул қилгани аниқланса тўрт, мабодо билмасдан фойдаланган бўлса, икки йилга дисквалификация қилиниши мумкин.
Изоҳ (0)