Тошкентда Ўзбекистоннинг миллий маҳсулотлардан ясалган энг катта харитаси тақдим этилди (фото)

6 март куни Тошкентдаги «Samarqand Darvoza» савдо-кўнгилочар марказида ошпаз ва ресторатор Баҳриддин Чустий миллий озиқ-овқат маҳсулотларидан фойдаланган ҳолда Ўзбекистоннинг энг катта харитасини яратди. Бу ҳақда «Письма о Ташкенте» хабар қилди.

Озиқ-овқатлардан қилинган маҳсулот Interrecord агентлиги томонидан «миллий маҳсулотлардан қилинган энг катта Ўзбекистон харитаси» дея рўйхатга олинди. Харита узунлиги 6 метр, кенглиги 3 метр бўлиб, уни тайёрлашда 20 дан зиёд миллий маҳсулотлардан фойдаланилди.

Ҳар бир вилоятни, шунингдек, чегаралар ва дарёларни акс эттириш учун муайян маҳсулот ишлатилди, жумладан:

1. Андижон — девзира, 1,2 кг;
2. Наманган — сариқ майиз, 1,1 кг;
3. Фарғона — Қўқон ҳолваси, 1,8 кг;
4. Тошкент — мош, 1 кг ва қази, 1,5 кг;
5. Сирдарё — қовурилган нўхат, 900 гр;
6. Жиззах — сомса, 148 дона;
7. Самарқанд — қора майиз, 2 кг;
8. Навоий — новвот, 22 кг;
9. Бухоро — шўрданак, 5 кг;
10. Сурхондарё — хандон писта, 1,7 кг;
11. Қашқадарё — ўрик қоқи, 5 кг;
12. Хоразм — ложувард (лазер) гуруч, 8954 дона — бу Ўзбекистон мустақилликка эришганидан бугунгача бўлган кунлар сони;
13. Қорақалпоғистон — 727 қовурилган чучвара ва талқон;
14. Дарё ва денгизлар — кўк парварда, 1, 2 кг;
15. Республика чегараси — қизил парварда, 3,1 кг;
16. Вилоятлар чегараси — сариқ парварда, 2 кг;
17. Тарихий обидалар — чак-чак, 13 пачка;
18. Буюк Ипак Йўли — талқон;
19. Карвонлар — шоколад ва мастика;
20. Сумалак учун ундирилган буғдой, 8 кг.