Ўзбекистон Республикаси Олий Мажлиси Сенати Кенгашининг 5 март куни бўлиб ўтган мажлисида фуқаролар йиғинлари раислари ва уларнинг маслаҳатчилари сайловига тайёргарлик кўриш ва уни ўтказиш тўғрисидаги масала муҳокама қилинди. Бу ҳақда Сенат Ахборот хизмати маълум қилди.
Муҳокама жараёнида Кенгаш аъзолари томонидан таъкидлаб ўтилганидек, сайловга тайёргарлик кўриш ва уни ўтказиш борасидаги энг муҳим талаб фуқаролар ўзини ўзи бошқариш органлари сайлови жараёнининг барча иштирокчилари томонидан амалдаги қонун ҳужжатлари талабларига оғишмай риоя этилишидан, раислар ва уларнинг маслаҳатчилари лавозимларига номзодлар билан фуқароларни батафсил таништиришдан иборат.
Масалани муҳокама қилиш якунлари бўйича олдинги сайловлар тажрибаси ва қонунчилик ҳужжатлари талабларини ҳисобга олган ҳолда, Кенгаш «Фуқаролар йиғинлари раислари (оқсоқоллари) ва уларнинг маслаҳатчилари сайловига тайёргарлик кўриш ҳамда уни ўтказиш тўғрисида» қарор қабул қилиб, унда сайловни ўтказиш муддатини белгилади, сайловни ташкил этиш ҳамда ўтказишга доир тадбирлар режаси, сайлов бюллетенлари намуналарини тасдиқлади.
Шунингдек, Кенгаш томонидан сайловни ташкил этиш ҳамда ўтказишга кўмаклашувчи комиссия тузилди ва унинг таркиби тасдиқланди. Комиссия таркибига парламент палаталари, «Маҳалла» хайрия жамоат фонди, Ўзбекистон Республикаси Адлия вазирлиги, Ўзбекистон Касаба уюшмалари федерацияси кенгаши, «Камолот» ёшлар ижтимоий ҳаракати, Фуқаролик жамияти шаклланишини мониторинг қилиш мустақил институти, Ўзбекистон Миллий телерадиокомпанияси, Ўзбекистон Миллий ахборот агентлиги, Республика Маънавият тарғибот маркази, бошқа вазирлик ва идораларнинг вакиллари киритилди.
Изоҳ (0)