КХДР АҚШ ва Жанубий Корея томонидан Key Resolve ва Foal Eagle ҳарбий ўқув машғулотларининг бошланишига жавобан уларга огоҳлантирувчи ядровий зарбалар билан таҳдид қилди, деб хабар беради «ТАСС».
Шимолий Корея Давлат мудофаа қўмитаси тарқатган баёнотда таъкидланишича, расмий Пхеньян «олий қўмондонликдан буйруқ келган тақдирда, ўз қуролли, хусусан, ядровий кучларининг қудратини намойиш этишга тайёр».
Ядровий зарбаларнинг нишонлари сифатида АҚШнинг континентал қисми ҳамда Осиё ва Тинч океани минтақасидаги базалари кўрсатилди.
«КХДР Жанубий Кореяни озод қилиш бўйича операция ўтказади. КХДР халқи ва армияси ватанни бирлаштириш йўлида муқаддас уруш бошлаш имкониятини қўлдан бой бермайди», — дейилади ҳужжатда.
АҚШ ва Жанубий Корея 7 март, душанба куни 30 апрелга қадар давом этадиган Key Resolve ва Foal Eagle номли ҳарбий машғулотларни бошлади. Бу икки давлатнинг ҳарбий ҳамкорлик тарихидаги энг йирик ўқув машғулотлари бўлади.
Изоҳ (0)