Ўзбекистоннинг Шанхай Ҳамкорлик Ташкилотига раислик қилаётгани жаҳон оммавий ахборот воситаларининг диққат марказида турибди, деб ёзади ЎзА. Масалан, яқинда Хитойда нашр этиладиган «Дунфан Сзабао» («Шарқ тонги») газетасида ушбу мавзуга бағишланган салмоқли мақола босилиб чиқди.
Унда муаллифнинг — газета халқаро янгиликлар департаменти директори Вей Синнинг қайд этишича, Ўзбекистоннинг тинчликсевар сиёсати ҳамда минтақадаги хавфсизлик ва барқарорликни таъминлаш бўйича изчил саъй-ҳаракатлари туфайли мамлакатнинг халқаро обрў-эътибори йил сайин ортиб бормоқда. Республика нуфузли халқаро тизимлар, шу жумладан, Шанхай Ҳамкорлик Ташкилоти доирасидаги ҳамкорликка алоҳида эътибор қаратмоқда.
Мақолада ШҲТ ташкил топиши ва ривожланишида Ўзбекистон тутган ўринга юқори баҳо берилган. Маълум қилинганидек, ушбу тизимнинг асосчи мамлакатларидан бири ҳисобланадиган Ўзбекистон ҳозирги пайтга қадар ташкилотга икки маротаба — 2003—2004 ва 2009—2010 йиллари раислик қилган. Журналист таъкидлаганидек, айнан Ўзбекистон ташаббуси билан ШҲТ фаолиятини такомиллаштириш, турли йўналишлардаги ўзаро ҳамкорликни янада кенгайтириш тўғрисидаги кўпгина муҳим ҳужжат ва қарорлар қабул қилинган.
«Ўзбекистон раислиги даврида — 2010 йилнинг апрелида муҳим тарихий воқеа рўй берди: БМТ Бош котиби Пан Ги Муннинг Тошкентга буюрган ташрифи чоғида БМТ ва ШҲТ котибиятлари ўртасида Ҳамкорлик тўғрисидаги Қўшма декларация имзоланди. Бу қарор долзарб масалаларнинг ҳал этилишида биргаликдаги саъй-ҳаракатлар учун мустаҳкам замин яратгани ҳолда икки ташкилотнинг расмий ҳамкорлигини бошлаб берди», — деб ёзади Вей Син.
Хитойлик шарҳловчи қайд этганидек, 2015 йил 11 июль куни ШҲТ раислиги навбати яна Ўзбекистон Республикасига ўтди. Ташкил топганининг 15 йиллиги нишонланадиган жорий йилда мазкур ташкилот ўз фаолиятида истиқбол учун кўзда тутган режаларини муваффақият билан амалга ошириш юзасидан масъулиятни янада оширади.
Изоҳ (0)