Криштиану Роналду: орзуим — компьютер ўйинидагидек, 11 та рақибни алдаб ўтиб, гол уриш

«Реал» ҳужумчиси Криштиану Роналду долзарб мавзулар бўйича ўз фикрларини билдирди, деб ёзади «Sports.ru».

Чемпионлар лигаси ҳақида гапирар экан, у «Реал» учун қийин кечаётганини таъкидлади. «Испания кубогидан эса жамоамиз чиқиб кетди. Бироқ биз Чемпионлар лигасида ҳали қатнашмоқдамиз ва унда ғолиб бўлишга умид қилмоқдамиз… Биз олға юриш учун ‘Рома’ билан жавоб учрашувида яхши ўйин кўрсатиб, ғалабага эришишимиз керак», — деди Роналду.

Шунингдек, футболчи ўзининг ўйин даражасига тўхталиб ўтди. «Ўйлашимча, мен доим бир хил даражада ўйнайман. Режаларим ‘Реал’ номидан ўйнаб, тахминан шу тарзда давом этиш ҳамда жамоа билан биргаликда ва алоҳида мукофотларни қўлга киритиб, шу билан мухлисларимни хурсанд қилишдан иборат», — дея қайд этди у.

Криштиану Роналду орзусидаги гол ҳақида эса қуйидагича фикр билдирди: «Мен кўп марта жуда яхши голларни урдим. Орзуимдаги гол — 11 та рақибни ютиб, урилган гол. Бундай голларни компьютер ўйинларида уриш мумкин. Буни ҳаётда амалга ошириб бўлмайди, деб ўйлайман, янаям ким билсин».