«Ангрен—Поп» темирйўлининг Қамчиқ довонидан ўтган қисмида хитойлик ҳамкорлар томонидан қурилган туннелининг бириктириш маросими бўлиб ўтди. Бу ҳақда маросимда қатнашган Facebook фойдаланувчиси Зафар Арслонов ўз саҳифасида маълум қилди.
Зафар Арслоновнинг ёзишича, Қамчиқ туннелини бириктириш маросимида «Ўзбекистон темир йўллари» акциядорлик жамияти бошқаруви раиси Очилбой Раматов, Хитойнинг Ўзбекистондаги элчиси Сун Лицзе, Наманган вилояти ҳокими Хайрулла Бозоров қатнашган.
«Юқори мартабали меҳмонлар 19 километрли туннелни кесиб ўтди», — деб ёзади Зафар Арслонов.
Маълумот учун, 2013 йилда Хитойнинг Чина Раилwай Туннел Group компанияси Қамчиқ довонидан ўтувчи, умумий қиймати 455 миллион доллар бўлган 19 километрлик туннел ва фавқулодда ҳолатлар учун қия туннел қуриш мажбуриятини олган эди.
2015 йилнинг августида асосий туннелнинг 13 километр, қўшимча туннелда 14 километр қазиш ишлари бажарилгани, асосий туннелнинг 8,6 километрлик қисмида пардозлаш ишлари амалга оширилгани маълум бўлганди.
Дастлабки режа бўйича қурилиши 2016 йил июлида якунига етиши керак бўлган туннел, «Ўзбекистон темир йўллари» матбуот хизмати маълумотига кўра, жаҳон рейтингида тоғли ҳудудларда жойлашган туннеллар орасида 8-ўринда, туннелдаги темир йўл полотноси узунлиги бўйича эса 13-ўринда туради.
Изоҳ (0)