Ўзбекистон касаба уюшмалари Федерацияси Кенгаши, Ўзбекистон Республикаси Маданият ва спорт ишлари ҳамда Халқ таълими вазирликлари, Ўзбекистон Ёзувчилар ва Бастакорлар уюшмалари, Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон электрон оммавий ахборот воситалари миллий ассоциацияси томонидан болалар қўшиқлари, шеърлари ва ҳисоб шеърларни яратиш бўйича республика ижодий танлови эълон қилинди. Бу ҳақда Кенгаш матбуот хизмати маълум қилди.
Бастакор ва шоирлар, болалар ижодий жамоалари, мусиқа ва санъат мактаблари вакиллари таклиф этиладиган танлов энг яхши янги қўшиқ, шеър ва ҳисоб шеъри каби 3 йўналиш бўйича ўтказилади ҳамда икки босқичдан иборат. Ҳудудий босқичда ижодий ишлар 2016 йил 1 февралидан 1 апрелигача Қорақалпоғистон Республикаси, барча вилоятлар ва Тошкент шаҳар касаба уюшмалари ҳудудий бирлашмаларида қабул қилинади. Номзодларни саралаш 1 апрелдан 5 апрелга қадар амалга оширилади. Республика саралаш босқичи Тошкент шаҳрида ўтказилади.
Иштирокчиларни рўйхатга олиш, ижодий ишларни қабул қилиш 10 апрелдан 25 апрелгача, номзодларни саралаш 26 апрелдан 30 апрелгача ташкил этилади. Унда ғолибликни қўлга киритган, фаол иштирок этган бастакор ва шоирлар, ижодий жамоалар 1 июнь — Халқаро болаларни ҳимоя қилиш куни арафасида эълон қилинади ҳамда Ўзбекистон касаба уюшмалари Федерацияси томонидан қимматбаҳо совғалар билан тақдирланади.
Изоҳ (0)