Microsoft компанияси асосчиси Билл Гейтснинг Financial Times нашрига берган интервьюсида айтишича, гап террорга қарши кураш борасида кетганида, хусусий ташкилот ва корхоналар давлатга фойдаланувчилар ҳақидаги маълумотларни тақдим этиши лозим. Бу ҳақда TJournal хабар қилмоқда.
«Бу конкрет ҳолат, унда давлат ахборотга дахл қилишга рухсат сўрамоқда. Улар умумий нарсани сўрамаяпти, улар фақат хусусий бир ҳолат учун сўрамоқда... Бу оператордан бировнинг телефон алоқаси ёхуд банк ҳисоби ҳақида маълумот олиш билан боғлиқ масаладан мутлақо фарқ қилмайди. Давлат сўраётган ахборот билан унинг ўртасида ҳеч қандай фарқ йўқ... Савол оддий: сайловчилар давлат айрим ҳолатларда турли-туман ахборотга дахл қила олишини истайдими?» – деди Гейтс.
Шу билан бирга, унинг фикрича, агарда Apple бир марта бундай турдаги ахборотни тақдим этишга кўнса, бу ишни кейинчалик ҳам амалга ошира олишини оммавий тарзда тан олган бўлади.
Эслатиб ўтамиз, 16 февраль куни АҚШ суди Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди. Суд қарорига мувофиқ, корпорация шу пайтга қадар террорчилардан бири Саид Фаруқнинг мобил ускунаси маълумотларига бузиб кира олмаётган ФҚБ ходимларига махсус дастурий таъминот тақдим этиши талаб қилинади. Корпорация раҳбари Тим Кук бунга жавобан суд қарорига расмий эътироз билдирилишини таъкидлаб ўтди.
Муқаддам Google, WhatsApp, Facebook ва Twitter компаниялари Apple’ни қўллаб-қувватлашини маълум қилган эди.
Изоҳ (0)