Тошкент шаҳри ва вилоятида вақтинчалик прописка очилгани маълум қилинди

«Tafsilot.uz» сайти Ягона портал орқали Ўзбекистон Республикаси Ички ишлар вазирига хат йўллаб, унга Тошкент шаҳри ва вилоятида фуқароларни вақтинчалик ҳисобга олиш қачондан очилиши бўйича савол билан мурожаат қилди. Мурожаатга Ички ишлар вазирлигининг Хорижга чиқиш, келиш ва фуқароликни расмийлаштириш бошқармаси бошлиғи Бадридин Шорихсиев имзоси билан жавоб олинди. «Tafsilot.uz» сайтида хатнинг электрон нусхаси эълон қилинди.

Жавоб хатида таъкидланишича, Ички ишлар вазирлигининг «Фуқарони Тошкент шаҳрида ва Тошкент вилоятида турган жойи бўйича ҳисобга олиш» тартиби тўғрисидаги меъёрий ҳужжатларга қўшимча ўзгартириш киритилиши муносабати билан 2015 йилнинг 25 октябрь кунидан буён фуқароларни турган жойи бўйича вақтинча рўйхатга олиш бир муддатга тўхтатилган. Бироқ бугунги кунга келиб вақтинчалик ҳисобга олиш яна очилган.

«Бугунги кунда, фуқарони Тошкент шаҳрида ва Тошкент вилоятида турган жойи бўйича ҳисобга олиш фуқарони яшаш жойидан пропискадан чиқармасдан беш кундан олти ойгача муддатга (ўқиш учун таълим муассасасига келган шахслар учун – ўқиш даврига) шаҳар, туман ИИБ ХЧКваФРБ ходимлари томонидан амалга оширилмоқда», – дейилади хатда.