Американинг Virgin Galactic компанияси 19 февраль, жума куни сайёҳлар учун мўлжалланган SpaceShipTwo суборбитал космик кемасининг янги моделини илк маротаба намойиш этди, деб ёзади «ТАСС». У бир ярим йилча аввал ҳалокатга учраган намуна ўрнига ясалди.
Космолётни компания хўжайини — британиялик Ричард Брэнсон намойиш қилди. Кеманинг ташқи қиёфаси 2014 йил октябрида Калифорния жанубидаги Мохаве чўлида синов парвозини амалга ошириш чоғида ҳалокатга учраган аввалги моделдан фарқ қилмайди. VSS Unity деб ном олган янги модель анча хавфсизроқ ҳолатга келтирилгани, космолётни бошқариш функцияларининг кўпчилиги автоматлаштирилгани таъкидланди.
Аввалги модель ҳалокати оқибатида учувчилардан бири ҳаётдан кўз юмган, иккинчиси жароҳат олган эди. Экспертлар ўшанда путур кўрган компания обрўси янги модель муваффақиятли тарзда синовдан ўтгач, тикланишини қайд этди.
Космолётда икки соатлик саёҳат 250 минг долларни ташкил этиши мумкин. Саёҳат давомида одамлар вазнсизлик ҳолатига тушиб кўради, шунингдек, Ерни 100 км баландликдан томоша қилади.
SpaceShipTwo ўз бортига икки учувчи ва олти йўловчини сиғдира олади. Унда коинотга учиш истагини 800 дан зиёд киши билдиришга улгурди, улар орасида актёрлар Том Хэнкс ва Анжелина Жоли ҳам бор.
Изоҳ (0)