Android операцион тизимининг янги версиясида бизни нималар кутмоқда?

TJournal Google’нинг янги Android N операцион тизими ҳақида пайдо бўлган маълумотларнинг барчасини жамлаб, тақдим этди.

Google Android’нинг янги бош версиясини 18—20 май кунлари Google бош қароргоҳи жойлашган Маунтин-Вьюда бўлиб ўтадиган Google I/О анъанавий тадбирида намойиш этади.

Android ишлаб чиқувчиларидан бири маълум қилишича, операцион тизимнинг планшетлар учун мўлжалланган версияси смартфонларникидан фарқ қилиши кутилмоқда. Бунда гап кўп ойнали режим ёки катта экранни бир қўлда бошқариш ҳақида бораётган бўлиши мумкин.

Google Android’нинг ҳар бир версиясини алифбо тартибида номлайди ва у албатта қандайдир ширинликни билдириши керак. Фойдаланувчилар бу галги версия Nutella (Android 7.0 Nutella) ёки Nouga деб аталишини тахмин қилмоқда.

Google мухлислари Chrome ОS ва Android бирлаштирилишини кутмоқда. Компаниянинг ўзи ҳам ҳар иккала операцион тизимдаги энг яхши жиҳатларни уйғунлаштириш йўлларини қидираётгани ҳақида маълум қилган эди.

Яна бир аниқлаштирилмаган пункт — янги Android’да стилусдан фойдаланиш имконияти мавжуд бўлиши мумкинлиги. Буларнинг барчаси эса фақат май ойида аниқ бўлади.