Фойдаланувчилар санани ўзгартириш орқали iPhone’ни «бузиш» йўлини топди (видео)

64 битли процессорга эга iOS-қурилмалардаги сана 1970 йил 1 январга ўзгартирилса, улар ишламай қолади, дея хабар бермоқда Meduza бир қатор нашрлар, шунингдек, санани ўзгартириш жараёнини видеога олган блогерларга таяниб.

Носозлик iPhone 5s ва ундан катта моделлар, iPad Mini’нинг 2-версияси ва ундан кейингилари, iPad Air ва iPad Pro’да кузатилиши мумкин. Сана киритилгач, iOS’да ишловчи қурилма ёнмай қолади.

Фойдаланувчилар ёзишича, аккумуляторни узиш орқали смартфонни ҳаётга қайтариш мумкин, бироқ буни уй шароитида бажариш қийин. Баъзи фойдаланувчилар таъкидлашича, iPhone бир неча соат ишламай тургач ёки SIM-картаси ўзгартирилгач, қайта ишлаб кетади.

Шу пайтгача iOS’даги бундай носозлик ҳақида маълум бўлмаган.

1970 йил 1 январь UNIX ва POSIX’га мос келадиган операцион тизимларда вақтни ҳисоблаш нуқтаси ҳисобланади. Тахминлардан бирига кўра, iOS’даги носозлик шу билан боғлиқки, сана 1970 йил бошига ўтказилганида операцион тизим вақтнинг манфий қийматини қабул қилади.