My.gov.uz’даги 29 та интерактив давлат хизмати тўлиқ амалга оширилмаётгани аниқланди

Алоқа, ахборотлаштириш ва телекоммуникация технологиялари соҳасида назорат бўйича давлат инспекцияси Ягона интерактив давлат хизматлари портали (Ягона портал) орқали кўрсатилаётган интерактив давлат хизматлари мониторингини ўтказди.

Инспекция матбуот хизматининг маълум қилишича, январь ойида ўтказилган мониторинг 146 та давлат ва хўжалик бошқаруви органлари, маҳаллий давлат ҳокимияти органлари томонидан кўрсатилаётган интерактив давлат хизматларини қамраб олган.

Мониторинг натижасида давлат ва хўжалик бошқаруви органларида, маҳаллий давлат ҳокимияти органлари томонидан Ягона портал орқали тақдим этилаётган 740 та интерактив давлат хизматларидан 29 таси тўлиқ амалга оширилмаётганлиги аниқланди.

«Аниқланган камчиликларни бартараф этиш бўйича Ўзбекистон Ахборот технологиялари ва коммуникацияларини ривожлантириш вазирлиги ва тегишли идоралар билан ишлар амалга оширилмоқда», — дейилади инспекция ахборотида.

Айнан қайси интерактив давлат хизматлари тўлиқ амалга оширилмаётгани ҳақида батафсил ахборот берилмаган.