Twitter твитларни акс эттириш учун янги алгоритмни тақдим этди

Twitter ижтимоий тармоғи лентадаги хабарларнинг намойиш этилишининг янгича принципини жорий этди. Бу ҳақда Twitter’нинг Россиядаги матбуот хизматига таяниб, «РБК» хабар бермоқда.

Янги алгоритм қуйидаги тартибда ишлайди: маълум бир вақт сервисни ишлатмаган фойдаланувчи Twitter’га кирганда, ижтимоий тармоқ ҳар бий фойдаланувчи учун танлаб қўйган энг муҳим твитлар тескари хронологик тартибда намойиш қилинади.

Унинг остида эса қолган твитлар одатий тартибда чиқиб туради. Хабарлар лентасининг эски форматига қайтиш учун фойдаланувчи саҳифани янгилаши кифоя.

Янги алгоритмни фаоллаштириш учун фойдаланувчилар созлашлар бўлимида «Аввалига энг яхши твитларни кўрсатиш» (Show me the best Tweets first) функциясини танлаши лозим. Компания матбуот хизмати ушбу функцияни истаган вақтда ўчириш мумкинлигини маълум қилмоқда.

Twitter’нинг iOS, Android ва десктоп версияси фойдаланувчилари тез орада янги функциядан фойдаланиши мумкин бўлади.

Эслатиб ўтамиз, 6 февраль куни Twitter яқин кунларда янги алгоритм жорий этиши, унда твитлар даврий тартибда эмас, балки фойдаланувчи нимани кўришни исташига қараб чиқарилиши ҳақида хабар берилганди. Аммо компания раҳбари Жек Дорси бу хабарларни рад этди. Дорси Twitter жамоаси сервисни янада жонлироқ қилишга уринаётганини айтиб, «Сиз бўлмаганда» функциясининг жорий этилиши ҳам шундан далолат эканлигини айтганди.