Apple технологиялардан рухсатсиз фойдалангани учун 625 млн доллар тўлайди

VirnetX компанияси Apple  корпорациясини патент ҳуқуқларини бузишда айблаб, судга мурожаат этди. Техас штати Шарқий округи федерал суди ушбу даъвони қаноатлантирди. Бу ҳақда «Hi-tech.mail.ru» хабар бермоқда.

Илк бор VirnetX 2012 йилда судга мурожаат қилган ва Apple’ни FaceTime ҳамда iMessage каби дастурларда патентланган хавфсиз коммуникациялар технологияларидан ноқонуний фойдаланишда айблаган эди. Суд даъвони қўллаб-қувватлаган ва патент эгасига 368,2 миллион доллар тўлаш ҳақида ҳукм чиқарган.

Apple орадан икки йил ўтгач мазкур қарор устидан шикоят қилди ва VirnetX’ни қайтадан даъво аризаси киритишга мажбур этди, бироқ бу гал талаб этилаётган сумма 532 миллион доллар эди. Apple ўзи томонидан патентлаштирилмаган технологиялардан фойдаланишда давом этаётгани маълум бўлгач, ушбу рақам 625,56 миллион долларга етди.

Корпорация бу гал ҳам тўлаш ниятида эмас, суд қарори устидан шикоят тайёрланмоқда.