Швейцария федерал ҳукумати мамлакатнинг барча фуқароларига шартсиз даромадни кафолатлаш масаласини референдумга қўйишга рози бўлди. Референдум июнь ойида бўлиб ўтади, деб хабар қилади Meduza.
Агар қонунчиликдаги ўзгариш қабул қилинса, швейцарияликлар ишлаш ёки ишламаслигидан қатъи назар ҳар ой 2500 франк (2250 евро) миқдорида даромад олади. Болаларга 625 франкдан тўланади.
Барча фуқароларни шартсиз даромадга ўтказиш мамлакатга бир йилда 208 миллиард франкка тушади. Бундан 150 миллиардни солиқлардан, қолган қисмини ижтимоий суғурта жамғармаларидан олиш мўлжалланган.
Ушбу ғоя тарафдорлари у амалга татбиқ этилгандан сўнг мамлакат аҳолисининг катта қисми кўп пул тўланадиган ишда эмас, ўзига мос иш билан шуғулланади, деб ҳисобламоқда.
Шартсиз даромад масаласи сўнгги йилларда бир неча ривожланган давлатларда муҳокама қилинмоқда. Финляндияда 2016 йил ноябрида тақдим этиладиган лойиҳага кўра, мамлакатнинг ҳар бир фуқаросига ҳукумат томонидан ҳар ойда 800 евродан тўланади.
Изоҳ (0)