“Bavariya” futbol klubi bosh murabbiyi Xosep Gvardiola 2015/2016-yilgi mavsum yakuniga yetganidan so‘ng, “Manchester Siti”da ish boshlaydi. Bu haqda Manchester klubi matbuot xizmati ma’lum qildi.
Angliya klubi bayonotiga ko‘ra, ispaniyalik 45 yoshli murabbiy “Manchester Siti” bilan uch yillik shartnoma imzolagan.
https://twitter.com/MCFC/status/694145921341362176
Xabar berishlaricha, “Manchester Siti” turli mish-mishlar paydo bo‘lishining oldini olish maqsadida Gvardiolaning klubda ish boshlashi haqida oldindan xabar berishga qaror qilgan.
“Sports.ru”ning xabar berishicha, “Manchester Siti” Gvardiolani klubga birinchi marta 2012-yilda taklif qilgandi. Tasdiqlanmagan ma’lumotlarga ko‘ra, Gvardiola yangi klubida yiliga 25 million yevro miqdorida maosh oladi.
Eslatib o‘tamiz, Gvardiola 2008—2012-yillarda “Barselona”ga murabbiylik qilgan va klub bilan 14 ta sovrinni qo‘lga kiritgan. U 2013-yildan beri “Bavariya”da ishlamoqda, o‘tgan davr mobaynida 5 ta sovrin egasiga aylandi.
“Manchester Siti”ga hozirda Manuel Pellegrini ustozlik qilmoqda. 2013-yilda jamoa bosh murabbiyi etib tayinlangan chililik mazkur mutaxassis 2013/2014-yilgi mavsum yakuniga ko‘ra Angliya chempionligini, shuningdek, 2014-yili Angliya Liga Kubogini qo‘lga kiritgan.
Izoh (0)