Тошкент педиатрия институтининг кардиожарроҳлик бўлими реанимациясида ҳар доим бир нарса чийиллаб туради, каравот ёнига қўйилган мониторларда рақам ва графиклар лип-лип этиб ўтади. Бу ерда юраги операция қилинган болалар ётади. Беморларни кўргани келганлар киритилмайди. Кичкинтойларнинг оналари реанимация олдида соқчилар каби, «болажонларига бир нигоҳ ташлаш учун», ичкарига киришга рухсат кутади.
Хондона Маҳмудалиеванинг онаси Дилдор ўз соқчилигини тугатди — қизалоғини реанимациядан оддий палатага ўтказишди: қизалоқ энди қўғирчоғи билан ўйнар, оҳиста жилмайиб, бир нималарни чуғурлаб, ўзи билан ўзи овора.
Хондона атиги бир ёшу икки ойлик, унга туғилганидаёқ Фалло тетрадаси деб аталмиш юрак хасталиги ташхиси қўйилган.
«Тетрада» тўрт маъносини англатади ва бундай ташхис юрак тузилишида тўртда нуқсон бор, дегани. Бу болаларда учрайдиган туғма хасталиклардан бири бўлиб, юрак хасталикларининг 10 фоизини ташкил этади. Даволамаса, оқибати ачинарли — хаста болаларнинг тўртдан бири бир ёшгача нобуд бўлади. Ўрта ҳисобда, бундай беморлар 12 йил умр кўради.
Болалар кардиожарроҳлик бўлими мудири Дониёр Пирназаров айтишича, бундай туғма хасталиклар ва бузилишлар пренатал ривожланиш босқичида юзага келади. Бошқа юрак хасталиклари сингари Фалло тетрадаси ҳам ҳомиланинг юраги шаклланаётган даврда — ҳомиладорликнинг тўққизинчи ҳафтасигача шаклланади. Шу даврда турли салбий таъсирлар мавжуд бўлса, бу ҳомила ривожланишининг бузилишига олиб келади. Касалликнинг сабаби ген даражасида ётади ва икки хил бўлади — наслдан наслга ўтувчи ёки турли мутаген факторлар таъсирида пайдо бўлувчи. Бу салбий таъсир турли ионлантирувчи нурланиш, кимёвий моддалар (айрим дорилар, зарарли моддалар), алкогол, вирус ва микроблардан бўлиши мумкин. Шифокорларнинг сўзларига кўра, қариндошлар ўртасидаги никоҳ туғма юрак хасталиклари хавфини бир неча карра оширади.
Хондона оиладаги учинчи фарзанд — узоқ кутилган ягона қизалоқ, унинг икки акаси бор, уларнинг бири болалар серебрал фалажига чалинган. Қизалоқнинг онаси — Дилдор математика ўқитувчиси сифатида мактабда ишлайди, ҳозир декрет таътилида. Бахтга қарши, математика ёрдам беролмади — оила бюджети рақамлари операция учун талаб этилган миқдорга етмади. Шифокорлар операцияни тезроқ ўтказиш кераклигини таъкидлар, бироқ керакли материаллар ва очиқ юракда операция ўтказиш учун зарур бўлган оксигенаторга етарли пул тўплашга оиланинг қурби етмасди.
Янги йил кечаси, курантлар бонг ураётган пайтда, Дилдор бир ниятни дилига тугиб қўйди — мўъжиза рўй берса-ю, фарзандлари соғайиб кетса. Январнинг биринчи кунларида Дилдорни қизалоғи билан Тошкентга, операцияга таклиф қилишди. Маълум бўлишича, улар «Сочная долина» савдо маркасининг «Биргаликда ҳаётларни қутқарамиз!» хайрия акцияси доирасида операция учун зарур оксигенатор ва бошқа материаллари харажатлари тўлаб берилганлар қаторига кирган экан. 2015 йилнинг ноябрь ойи мобайнида «Сочная долина»нинг сотилган ҳар бир шарбати қутисидан тушган пулнинг муайян қисми Тошкент педиатрия институтининг хайрия ҳисоб-рақамига ўтказилиб, кам таъминланган оилаларнинг юрак операциясига ўта муҳтож, оғир хасталикка чалинган болаларини даволаш учун йўналтирилди.
Дилдор мазкур акцияни «қўл билан яратилган мўъжиза» деб атади. «Энди қизимнинг юрагида минглаб инсонларнинг юраги ураяпти ва мен буни ҳеч қачон унутмайман», — деди у хайрлашув вақтида.
Бу «Сочная долина» савдо маркаси ўтказган «Биргаликда ҳаётларни қутқарамиз!» хайрия акцияси доирасидаги тўртинчи ҳикоя ва бу ҳикояларнинг ҳали давом бор.
Юрак ҳикоялари-3. «Ура, мен операцияга бораман!»
Юрак ҳикоялари-2. «Энди мен яшашни истайман…»
Юрак ҳикоялари: «Мен бор жойда доим қуёш чарақлайди…»
Реклама ҳуқуқи асосида. Маҳсулот сертификатланган
Изоҳ (0)