Қатар давлатида давом этаётган футбол бўйича U-23 Осиё чемпионатининг дастлабки ярим финалчилари номи маълум бўлди. Бу ҳақда ОФК расмий сайти хабар бермоқда.
22 январь, пайшанба куни чемпионат доирасида икки чорак финал учрашуви бўлиб ўтди — Япония Эронга қарши баҳс олиб борган бўлса, мусобақа мезбони Қатар Шимолий Корея билан ўйнади. Ҳар иккала ўйин тақдири қўшимча вақтларда ҳал бўлди.
Япония — Эрон учрашувининг асосий вақтида ҳисоб очилмади. Қўшимча 30 дақиқаликда эса Япония терма жамоаси Эрон дарвозасига жавобсиз учта гол урди (Юта Тоёкава, 95-дақиқа; Шоя Накажима, 108, 110-дақиқалар).
Қатар терма жамоаси КХДРга қарши учрашувнинг 6-дақиқасида (гол муаллифи — Акрам Афиф) ҳисобни очган бўлса-да, 90+1-дақиқада ўз дарвозасидан тўп ўтказиб юборди (гол муаллифи — Су Кён Жин). Ўйин тақдирини ҳал қилган гол 92-дақиқада Али Асадулла томонидан киритилди.
23 январь, шанба куни U-23 Осиё чемпионати доирасидаги навбатдаги чорак финал учрашувлари бўлиб ўтади: Жанубий Корея Иорданияга қарши, БАА эса Ироққа қарши баҳс олиб боради. Мусобақа ярим финалида Жанубий Корея/Иордания жуфтлиги ғолиби Қатарга қарши, БАА/Ироқ ғолиби эса Японияга қарши баҳс олиб боради.
Эслатиб ўтамиз, футбол бўйича Ўзбекистон олимпия терма жамоаси U-23 Осиё чемпионатини гуруҳ босқичидан кейиноқ тарк этган. Самвел Бабаян шогирдлари дастлаб Жанубий Корея ва Ироққа мағлуб бўлди, сўнгги турда эса Яман устидан 3:1 ҳисобида ғалаба қозонди.
Изоҳ (0)