Ҳиндистоннинг Ченнай шаҳрида шахмат бўйича анъанавий халқаро турнирда 21 январь куни бир йўла иккита тур учрашувлари ўтказилди, деб хабар беради «Оламспорт».
Мусобақада 14-рақам остида таснифланган ўзбекистонлик гроссмейстер Марат Жумаев аввалига қора доналарда турнирнинг биринчи рақамли шахматчиси россиялик Борис Грачев билан дуранг ўйнади. Кейин эса оқ доналарда ҳиндистонлик шахматчи Кумар Винотни мағлубиятга учратди.
Олтита учрашувда тўртта ғалаба ва иккита дуранг қайд этган Марат Жумаев 5 очко билан турнир жадвалида қўшимча кўрсаткичларга кўра 9-ўринни эгаллаб турибди. Лекин биринчи ўриндаги Юрий Солодовниченко ҳисобида ҳам айнан 5 очко бор.
Бугун, 22 январь куни Жумаев 7-тур учрашувида россиялик Антон Демченко билан баҳс юритади. Демченко 5 очко билан 8-поғонадан жой олган.
Ўз тарихида саккизинчи бор ташкил этилган Chennai Open мусобақасида 11 давлатдан жами 213 шахматчи бош мукофот учун дона суряпти.
Эслатиб ўтамиз, Марат Жумаев 4-турда оқ доналарда ҳаракат қилиб, мезбонлар вакили Шет Жайкумар Саммедни мағлубиятга учратган эди.
Изоҳ (0)