Грознийда Қодировни қўллаб-қувватлаш мақсадида ўтказилган митингга 1 млн киши йиғилди

Чеченистон пойтахти Грознийда республика раҳбари Рамзан Қодировни қўллаб-қувватлаш мақсадида митинг бошланди, деб ёзади «Интерфакс».

Акция «Бирликдадир кучимиз» деб ном олди. «Грозний ТВ» телекомпанияси таъкидлашича, унда бир миллионга яқин киши қатнашмоқда. Чеченистон журналистлари акцияни «Россиянинг замонавий тарихидаги энг йирикларидан бири» деб таърифламоқда.

Митинг «Биз Владимир Путин тарафдоримиз!», «Биз Рамзан Қодиров тарафдоримиз!», «Бешинчи колонна йўқ бўлсин!», «Нaвaльний муваффақиятсиз йўлни танлади» каби шиорлар остида ўтмоқда. Унинг иштирокчилари либерал ОАВлар томонидан Россияга қарши ахборот уруши кучайиб бораётгани юзасидан хавотир билдирмоқда.

Эслатиб ўтамиз, 12 январь куни Қодиров журналистлар билан учрашувда «тизимдан ташқаридаги мухолифат вакилларига халқ душманлари, хоинлар каби муносабатда бўлиш», «бундай кишиларни уларнинг қўпорувчилик фаолияти учун суд қилиш»га даъват этган эди.

Шундан сўнг Россия президенти ҳузуридаги Инсон ҳуқуқлари бўйича кенгаш 12 январь куни мухолифатни «халқ душманлари» дея атаган Чеченистон раҳбари Рамзан Қодировнинг сўзларини лингвистик экспертизага жўнатиши хабар берилди. Ҳуқуқ муҳофазачилари ва жамоатчилик арбоблари эса уни ушбу гаплари учун истеъфога чиқарилишини талаб қилиб, ариза ёзди.

Кейинроқ Чеченистон раҳбари Рамзан Қодировнинг баёноти бўйича Инсон ҳуқуқлари кенгаш ҳисоботи ортиқча муҳокамаларнинг олдини олиш учун шахсан Владимир Путинга етказилиши маълум қилинди.

26 январь куни эса «Яблоко» партияси фаоллари Рамзан Қодировнинг истеъфосини талаб қилиб, митинг уюштиради.