Хонанда Лола (Йўлдошева) 2015 йил ёзида хорижий давлатларга амалга оширган саёҳатлари унинг қарашларига жиддий таъсир қилганини айтиб ўтди. Бу ҳақда у «Даракчи» газетасига берган интервьюсида маълум қилди.
«Ҳаётда сабабсиз ҳеч нарса бўлмас экан. Ҳар бир кичик саёҳат ҳам инсонни қалбан ўзгаришига сабаб бўлиши мумкин. 2015 йил ёзида ташвишлардан дам олиш учун шунчаки саёҳатга чиққан эдим. Бироқ бу сайр мени умуман бошқа Лолага айлантирди», — деди хонанда.
«Масалан, Испанияда бўлган вақтимда мен оддий ўсмир қизга айландим. Синглим билан бирга ҳамма нарсани унутиб, харита ёрдамида саёҳат қилдик. Қисқа вақт ичида турли шаҳарларнинг диққатга сазовор масканларини айланиб чиқдик. Ундан кейинги манзилимиз АҚШ бўлди», — деди Лола.
«У ерда мен 1,5 йилдан буён учрашмаган синглим Анора билан кўришдим. Болалигимизда бир-биримизни кўрмасак туролмасдик. Ана ўша дақиқаларда оиланинг қадри, яқинларнинг дийдори қанчалик муҳим эканлигини, қолган нарсалар эса оддий муаммолар эканлигини сездим», — деди хонанда.
«Ёзги таътилдан қайтганимда эса иш режамни бутунлай ўчириб, биринчи ўринга оилани қўйдим. Янги қўшиқ, клип чиқаришим шарт, концертга тайёргарилик кўриш вақти келди, деган ўйларни ўчириб ташлаб, оила даврасидаги ҳар бир лаҳзадан завқланишни ўргандим», — дея қўшимча қилди Лола.
Изоҳ (0)