Ўзбекистон Давлат жаҳон тиллари университетининг «Талабалар иттифоқи» (Students’ Union) таркибидаги «GDC — Girls development club» қизлар клубининг навбатдаги семинар-тренингида таниқли актриса Дилноза Кубаева иштирок этди. Бу ҳақда университетнинг Facebook’даги саҳифасида хабар қолдирилган.
Тренинг давомида таниқли актирса қизларга мафтункорлик, чин ўзбек қизларида бўлиши лозим ҳислатлар, одоб-ахлоқ, кийиниш маданияти ҳақида фойдали тавсиялар бериб ўтди. Самимий руҳда ўтган учрашувда, «Qalampir.uz»нинг ёзишича, актриса ҳаётидаги синовли вақтларни ҳақида сўзлаб берган.
«Озми-кўпми бошимга синовлар, елкамга катта юк тушди. Нолимайман, аксинча, хурсанд бўламан. Худо мени синаб, чиниқтириб тоблаяпти. Бу ижро этаётган ролларимга ҳам ёрдам беради ҳатто. Ҳаётимда шундай кунлар бўлдики, кулишни ҳам унутиб қўйдим», — дейди актриса.
«Турмуш ўртоғим оғир хасталикка чалинган пайтлари оила аъзоларим ёнимда бўлолмай қолишди, деярли ёлғиз қолиб кетдим. Машина ҳайдашни билмайман, таксида кетаман, кўзойнакда бўлсам ҳам ҳайдовчилар таниб қолиб саволга тутарди», — деди Дилноза Кубаева.
«Ўша маҳал юрагимга ҳеч нарса сиғмасди — чунки турмуш ўртоғим ўлим тўшагида ётибди. Шунақа кунлар бўлдики, оддийгина табассум қилишга қийналардим. Чақалоғим ҳақида тарқалган турли туҳматлар, бўлмаган гаплар... Шундай вазиятларда бахтли кунларнинг қадрига етар экансан», — дея қўшимча қилди актриса.
Изоҳ (0)