Январда баҳор: Ўзбекистондаги ноодатий илиқ ҳаво дарахт ва гулларни уйғотмоқда

Сўнгги бир-икки кундан бери кечаси ҳаво сезиларли совиганини ҳисобга олмаса, 2016 йилда қуёш чарақламаган бирор кун бўлмади ҳисоб. Қишнинг иккинчи ойидаги бу қадар ноодатий илиқлик, баҳорий ҳаво табиатни муддатидан аввал уйғонишга мажбур қилмоқда.

12 январь куни таниқли хонанда Лола Instagram’даги саҳифасида фотохабар қолдирди — унинг ёзишича, деразаси олдида бойчечак очилган.

16 январь куни Facebook фойдаланувчиларидан бири Чирчиқ шаҳрида бойчечаклар гуллагани ҳақида хабар қолдирди.

17 январь куни «Дарё» мобил мухбири Гулнора Юсупова Тошкент шаҳрининг Мирзо Улуғбек туманида бинафша ва бошқа гулларнинг очилганини, 18 январь куни эса бодом гуллаганини маълум қилди.

Чирчиқдаги бойчечаклар, Тошкентдаги бинафшалар ҳақидаги хабар чоп этилганидан сўнг, Facebook фойдаланувчиларидан бири «беш кун аввал Сурхондарёда бодом гуллагани» ҳақида ёзди.

Сурхондарёда январь ойида бодом гуллаши — рўй бериб турадиган ҳодиса. Масалан, 2015 йилнинг 15 январида Ўзбекистоннинг энг жанубий вилоятида бодом гуллаб кетгани, бунга «ҳаво ҳароратининг мутассил +10 даража илиқ келиши» сабаб бўлгани айтилганди.

Синоптикларнинг сўзларига кўра, январдаги бундай илиқ ҳавонинг сабаби — атмосферада жанубий-ғарбий оқимнинг устунлик қилаётгани ва у билан чет жануб ҳудудларидан Ўзбекистон ҳудудига илиқ ва нам ҳавонинг кириб келаётганидир. Бу тушунишга бироз қийинроқ гап, шунинг учун эътиборингизни 2015 йилги мана шундай баҳорий январдан сўнг март ойида қандай қаҳратон қиш бўлгани ҳақидаги «Ўзгидромет» ахборотига қаратамиз:

«2015 йилнинг аҳамиятли томони, тўрт фаслда ҳам иқлим меъёридан илиқроқ бўлди, энг сезиларли фарқ (+2,7 даража) қиш мавсумига тўғри келди. 2015 йилнинг аҳамиятли ҳаво аномалияси март ойи охиридаги совуқлар бўлди — ҳамма жойда дарахтлар гуллаган бир вақтда Урал ҳудудларидан кескин совуқ ҳаво кириб келди. 29—31 март кунлари Ўзбекистоннинг барча ҳудудларида қор ёғди. Ҳарорат кечаси -7...-2 даража совуқ бўлди. Бу сўнгги 50 йилдаги энг совуқ март бўлди. 30—31 март кунлари Ўзбекистоннинг аксарият ҳудудларида метеокузатувлар тарихидаги энг паст ҳарорат қайд этилди».