Украина президенти Владимир Зеленский 23 июль куни Туркияда Киев ва Москва ўртасида тинчлик музокараларининг янги раунди бўлиб ўтишини маълум қилди. Бу ҳақда Anadolu хабар берди.
Зеленский Украина Миллий хавфсизлик кенгаши котиби Рустем Умеров билан музокараларга тайёргарлик кўриш ва асирлар алмашиш масаласини муҳокама қилган.
“Умеров учрашув чоршанба кунига режалаштирилганини маълум қилди. Эртага батафсилроқ маълумот берамиз”, деди Зеленский видеомурожаатда.
Зеленский дипломатлардан бўлажак музокаралар халқаро форматда бўлишини сўраган. Россия томони эса Киевнинг таклифига дарҳол изоҳ бермаган. Бироқ рус ахборот агентлиги манбалари музокаралар 24—25 июль кунлари бўлиб ўтишини хабар қилган.
“Биз томонимиздан кун тартиби аниқ. Мезбон давлатларга ушбу музокараларнинг муҳимлигини яна бир бор эслатиб ўтмоқчиман”, деган Украина раҳбари Хʼда.
Шу кунларда Украина расмийлари Россияга қарши халқаро санкцияларни кенгайтириш, кўпроқ ҳарбий техникаларга эга бўлиб, молиялаштиришни кўпайтириш масалаларига устуворлик бериб келаётган эди.
“Дания моделидан тортиб Чехиянинг артиллерия ва француз техникаларигача… Ҳозир устуворлик барча турдаги дронларда”, деган президент.
Истанбулда 16 май ва 2 июнь кунлари Россия ва Украина ўртасида тинчлик музокараларининг дастлабки икки раунди бўлиб ўтганди. Унда ҳар икки томон ҳарбий асирларни алмашишга — биринчи навбатда, энг ёш ва энг оғир ярадорларни — ва ҳар икки томондан 6 минг аскарнинг жасадларини қайтаришга келишиб олганди.
Изоҳ (0)